Jo Ahd-E-Nau Mein KHamir-E-Bashar Banaya Jae

Khalid Mubashshir

jo ahd-e-nau men ḳhamir-e-bashar banaya jaa.e

sinan ko haath to neze ko sar banaya jaa.e

shab-e-hayat ko aise sahar banaya jaa.e

ik aftab sar-e-chashm-e-tar banaya jaa.e

mire havas ko ye kaun hukm deta hai

ki us ko markaz-e-qalb-o-nazar banaya jaa.e

main apne paikar-e-ḳhaki se mutma.in hi nahin

mire ḳhuda mujhe bar-e-digar banaya jaa.e

darun-e-zat kisi ka ye jabr hai mujh par

usi ko jaan usi ko jigar banaya jaa.e

sukun-o-rahat-e-jan ab kahin nahin mumkin

tumhare dil ko hi ab mustaqar banaya jaa.e

jo ham-nafas bhi ho hamraz bhi ho hamdam bhi

usi ko kyon na bhala ham-safar banaya jaa.e

bahut hi tang hain ye la-makan ke galiyare

so dasht-e-zat ko hi rahguzar banaya jaa.e

agar banana hi lazim hai kuchh to ai ‘ḳhalid’

ḳhud apni ḳhaak ko ab ke guhar banaya jaa.e