tera gham teri aarzu kab tak
mujh se ruTha rahega tu kab tak
be-zarurat ye hao-hu kab tak
vo nahin hai to justuju kab tak
ta-ba-kai ḳhvahishon ki sho.ala-zani
ye havas ki shadid lu kab tak
kuchh ravani ki intiha to ho
ya.ani arzan rahe lahu kab tak
mausam-e-roz-o-shab tamam bhi ho
ye tilismat-e-rang-o-bu kab tak
phuul baton ke kuchh labon pe khila
ankhon ankhon men guftugu kab tak
Leave a Reply