ḳhizan ka koi vajud hai na chaman men rang-e-bahar hai
jise janta hai tu karvan vo tiri nazar ka ghubar hai
na jamal men hain latafaten na latafaton men hai be-ḳhudi
ye junun-e-ishq ka bhuut hai jo bashar ke sar pe savar hai
mujhe be-niyaz-e-alam na kar mujhe be-nasib-e-sitam na kar
mire gham ki lazzat-e-javedan miri zindagi ki bahar hai
ye nahin nashat ka zamzama ise gosh-e-hosh se sun zara
mire saz-e-dil ki sada nahin miri be-kasi ki pukar hai
mujhe zindagi ki dua na de mujhe aisi saḳht saza na de
mujhe dekh aa ke qarib-tar mira har nafas mujhe baar hai
hai ḳhabar asiir riha hue hain farogh daur-e-bahar men
chalo ‘raaj ham bhi chale chalen ki chaman men urs-e-bahar hai
Leave a Reply