Wahshat Raza Ali Kalkatvi
aap apna ru-e-zeba dekhiye
ya mujhe mahv-e-tamasha dekhiye
shauq ko hangama-ara dekhiye
karobar hasrat-afza dekhiye
rang-e-gulzar-e-tamanna dekhiye
dilkashi-ha-e-tamasha dekhiye
husn hai sau rang men tahsin-talab
dida-e-hairan se kya kya dekhiye
bazm men us be-muravvat ki mujhe
dekhna paḌta hai kya kya dekhiye
hasrat ankhon men hai lab ḳhamosh hain
sheva-e-arz-e-tamanna dekhiye
haa.e re zauq-e-tamasha-e-jamal
ḳhud tamasha huun tamasha dekhiye
aap ne phir kar na dekha is taraf
ho gaya ḳhun-e-tamanna dekhiye
uThti hain nazren miri kis shauq se
mujh ko hangam-e-tamasha dekhiye
hasraton ka haa.e re dil men hujum
arzuon ka natija dekhiye
sajde ko betab hoti hain jabin
shoḳhi-e-naqsh-e-kaf-e-pa dekhiye
main huun us saaqi ka divana jise
dekhiye jab mast-e-sahba dekhiye
ḳhaak men kis din milati hai mujhe
us se milne ki tamanna dekhiye
kahte hain kar lenge us kafir ko raam
hazrat-e-‘vahshat’ ka daava dekhiye
Leave a Reply