kahin sharminda na ho rasm-e-vafa mere ba.ad
mere maazi ko na do meri saza mere ba.ad
aisa lagta hai ki sab ḳhuun ke pyase hain yahan
haa.e is shahr ka kya haal hua mere ba.ad
tishna-lab aur bhi a.enge yahan meri tarah
kaun dega unhen jiine ki dua mere ba.ad
mujh pe hi ḳhatm hua qahr zamane-bhar ka
phir kisi aur ka daman na jala mere ba.ad
ek hi shab men bane log masiha kitne
shahr men phir koi qatil na raha mere ba.ad
ab to apnon men bhi agli si sharafat na rahi
rishta-e-mehr-o-vafa TuuT gaya mere ba.ad
ghaliban main hi yahan lala-e-sahra tha ‘ra.is’
phir na sahra men koi phuul khila mere ba.ad
Leave a Reply