tum ko agar hamari mohabbat nahin rahi
ham ko bhi ab adu se adavat nahin rahi
har ik ada pe marne ki aadat nahin rahi
vo dil nahin raha vo tabiat nahin rahi
mazmun-e-muddaa abhi dil men hi tha mire
kahte hain ab to tab-e-samaat nahin rahi
vaan hai vahi vufur-e-itab-o-jafa-o-qahr
yaan naaz bhi uthane ki taqat nahin rahi
be-shak naqab-e-rukh se uthaya kisi ne aaj
zulmat-kade men mere jo zulmat nahin rahi
‘mushtaq’ tere ishq ki hai dhuum aj-kal
ab qais-o-kohkan ki vo shohrat nahin rahi