Gulzar Dehlvi
umr jo be-ḳhudi men guzri hai
bas vahi agahi men guzri hai
koi mauj-e-nasim se puchhe
kaisi avargi men guzri hai
un ki bhi rah saki na dara.i
jin ki askandari men guzri hai
aasra un ki rahbari Thahri
jin ki ḳhud rahzani men guzri hai
aas ke jugnuo sada kis ki
zindagi raushni men guzri hai
ham-nashini pe faḳhr kar nadan
sohbat-e-admi men guzri hai
yuun to sha.er bahut se guzre hain
apni bhi sha.eri men guzri hai
miir ke ba.ad ghalib o iqbal
ik sada, ik sadi men guzri hai
Leave a Reply