mere lahje men mire zaḳhm ki gahra.i hai
raushni raat ke angan men utar aa.i hai
phir mujhe pyaar ke sahil pe Thaharna hoga
phir tire dil ke dhaḌakne ki sada aa.i hai
dar-o-divar pe kuchh aks utar aate hain
mere ghar men ajab andaz ki tanha.i hai
sirf phulon men nahin hain tere chehre ke rang
mah-e-nau bhi tiri Thahri hui angḌa.i hai
vo saba sab jise avara kaha karte hain
tere anchal ki mahak mere liye laa.i hai
qahqaha-bar raho shola-e-gham se na Daro
varna is shahr-e-hunar men baḌi rusva.i hai
Leave a Reply