ḳhush thā ki us ke pyaar kā iqrār le liyā
aisā na ho ki jaan kā āzār le liyā
us kī dukāñ meñ kuchh to alag baat thī zarūr
varna ye kyuuñ ki ḳhvāb ḳharīdār le liyā
kam kam hī kholnā thā ma.īshat ke bādbāñ
kyuuñ nāḳhudā ne bār-e-ziyāñ-kār le liyā
shāyad ki bāġhbāñ kī baqā bhī isī meñ thī
shāḳhoñ ke sar se phuul kī dastār le liyā
āhan-garoñ ne saaz mashīnoñ kā chhīn kar
dast-e-hunar se naġhma-e-sarshār le liyā
itnā kahā ki pyaar meñ sehhat bhī chāhiye
phir hans ke mere haath se aḳhbār le liyā
yuuñ lafziyāt-e-ishq ke paikar badal ga.e
ma.anī ke lab se shoḳhī-e-iz.hār le liyā
zaḳhmoñ ke nau-ratan se thā gulzār qasr-e-dil
nādāñ ne shāh-e-faqr kā darbār le liyā
miTTī hamāre gaañv kī kachchī na thī ‘shahāb’
naddī ke ik kaTāv ne ghar-bār le liyā