ḳhush tha ki us ke pyaar ka iqrar le liya
aisa na ho ki jaan ka azar le liya
us ki dukan men kuchh to alag baat thi zarur
varna ye kyuun ki ḳhvab ḳharidar le liya
kam kam hi kholna tha ma.ishat ke badban
kyuun naḳhuda ne bar-e-ziyan-kar le liya
shayad ki baghban ki baqa bhi isi men thi
shaḳhon ke sar se phuul ki dastar le liya
ahan-garon ne saaz mashinon ka chhin kar
dast-e-hunar se naghma-e-sarshar le liya
itna kaha ki pyaar men sehhat bhi chahiye
phir hans ke mere haath se aḳhbar le liya
yuun lafziyat-e-ishq ke paikar badal ga.e
ma.ani ke lab se shoḳhi-e-iz.har le liya
zaḳhmon ke nau-ratan se tha gulzar qasr-e-dil
nadan ne shah-e-faqr ka darbar le liya
miTTi hamare gaanv ki kachchi na thi ‘shahab’
naddi ke ik kaTav ne ghar-bar le liya
Leave a Reply