Idris Babar
mash.hur to bas ek diya hai mire dil men
kitne hi sitaron ki jagah hai mire dil men
tum ne to hikayat hi sun rakkhi hain varna
vo shahr vo ḳheme vo sira hai mire dil men
main raah se bhaTkun to khaTakti hai koi baat
jis tarah koi samt-numa hai mire dil men
duniya se guzarne ko abhi umr paḌi hai
ye ḳhvab to kuchh din ko ruka hai mire dil men
ye ghar dar-o-divar ki had tak hai salamat
lekin vo jo ghar TuuT gaya hai mire dil men
ye log zara der ko Tal jaa.en to ‘babar’
main dekh luun kya vaqt hua hai mire dil men
Leave a Reply