un se iqrar-e-vafa ki aarzu karte rahe
umr-bhar ik be-zaban se guftugu karte rahe
jis taraf nazren uThin ik ajnabi chehra mila
a.ina-ḳhane men apni justuju karte rahe
tum se mil kar bhi raha ham ko tumhara intizar
tum ko pa kar bhi tumhari aarzu karte rahe
kaun jaane runuma huun kaun si janib se vo
is liye sajde pe sajda char-su karte rahe
husn ki gahra.iyan tasvir-dar-tasvir thiin
aa.ina ham aa.ine ke ru-ba-ru karte rahe
zindagi pabandiyon ka naam thi lekin ‘raza’
ham to zanjiron ko bhi zeb-e-gulu karte rahe
Leave a Reply