ho chuka jo ki muqaddar men tha darman hona
ab tire haath hai mushkil miri asan hona
tha jo maqsum men sharminda-e-ehsan hona
ghair ke haath raha dafn ka saman hona
husn ka ishq ki vaadi men numayan hona
ramz tha din ko sar-e-tur charaghan hona
lazzat-e-dard-e-jarahat to mire dil se na puchh
pahlu-e-zaḳhm men lazim tha namak-dan hona
ik qayamat ka saman tha tira ai sub.h-e-vatan
parda-e-sham-e-ghariban ka numayan hona
ḳhana-barbadiyan har samt se ghere hain mujhe
dar-o-divar pa likkha hai bayaban hona
imtihan-gah-e-mohabbat men na jaane kya ho
qahr ka samna hai tegh ka uryan hona
aa rahi hain ye umidon ki sada.en paiham
go safar saḳht hai lekin na hirasan hona
meri turbat bhi bani aisi zamin pe ‘alim’
jis ki taqdir men likkha tha bayaban hona
Leave a Reply