akasr miri zamin ne mire imtihan liye
zinda huun apne sar pe ka.i asman liye
bechargi kabhi mujhe sabit na kar saki
kya kya miri hayat ne mere bayan liye
apni sadaqaton se bhi lagne laga hai Dar
chalna hai is zamin pe sarab-e-guman liye
aur main ki apni zaat se nisbat nahin miri
har shaḳhs phir raha hai miri dastan liye
mangi nahin hai main ne kisi asman se dhuup
zinda huun apne hathon men apna jahan liye
saara qusur jaise miri bebasi ka tha
ilzam apne sar pe kisi ne kahan liye
unvan iztirab kiye kitne fasle
tum ne qadam qadam pe mire imtihan liye
pahna unhen to main bhi dhanak-posh ho ga.i
apna samajh ke main ne tumhare nishan liye
‘usha’ tamam umr kaTi intizar men
aaya na koi ghar men dil-e-mehrban liye
Leave a Reply