Hisab-E-Umr Karo Ya Hisab-E-Jam Karo

Sulaiman Areeb

hisab-e-umr karo ya hisab-e-jam karo

ba-qadr-e-zarf shab-e-gham ka ehtimam karo

agar zara bhi rivayat ki pasdari hai

ḳhirad ke daur men rasm-e-junun ko aam karo

ḳhuda gavah faqiron ka tajraba ye hai

jahan ho sub.h tumhari vahan na shaam karo

na rind o shaiḳh na mulla na mohtasib na faqih

ye mai-kada hai yahan sab ko shad-kam karo

vahi hai tesha bayaban vahi hai daar vahi

jo ho sake to zamane men tum bhi naam karo

ḳhiram-e-yar ki aahaT si dil se aati hai

sarishk-e-ḳhun se charaghan ka ehtimam karo

asir-e-zulf hamin ik nahin hain ‘mir’ bhi the

magar ab uTh ke do-alam ko zer-e-dam karo

‘arrib’ dekho na itrao chand sheron par

ghazal vo fan hai ki ‘ghalib’ ko tum salam karo