is safar men nim-jan main bhi nahin tu bhi nahin
aur zer-e-sa.eban main bhi nahin tu bhi nahin
zahr men Duubi hui parchha.iyon ka raqs hai
ḳhud se vabasta yahan main bhi nahin tu bhi nahin
na-tamami ke sharar men roz o shab jalte rahe
sach to ye hai be-zaban main bhi nahin tu bhi nahin
zard lafzon ke dhundalke shaam ki ankhon men hain
garche zeb-e-dastan main bhi nahin tu bhi nahin
na-tavan jismon pe kyuun hai gardishon ka mor-nach
shab-gazida asman main bhi nahin tu bhi nahin
be-asar ho jaa.e jis se dil ka zaḳhm-e-atishin
marham-e-vahm-o-guman main bhi nahin tu bhi nahin
shab ki gahri ḳhamushi bhi gosh-bar-avaz hai
ahaTon ka karvan main bhi nahin tu bhi nahin
ehtiyaton ki guzargahen to pichhe rah ga.iin
ab sada-e-mehrban main bhi nahin tu bhi nahin
Leave a Reply