paikar-e-sang-o-ahang jaisa tanha khaḌa huun vaise to
andar TuuTa phuTa huun salim lagta huun vaise to
zehn ki ankhon par danista paTTi bandhe baiTha huun
sab kuchh dekh raha huun sab kuchh samajh raha huun vaise to
kal gumnami ki gahri khaa.i men bhi gir sakta huun
shohrat ki unchi choTi par aaj khaḌa huun vaise to
bas ik munafiqat hai jis ki ne.amat se mahrum huun main
mere yaaro main bhi bilkul tum jaisa huun vaise to
apne badan ki qaid se lekin chhuTkara na-mumkin hai
bahar ki saari divaren toḌ chuka huun vaise to
jo tariki mere apne andar thi so qaa.em hai
galiyon galiyon chand sitare baanT raha huun vaise to
Leave a Reply