Khaleel Tanveer
mire vajud men the duur tak andhere bhi
kahin kahin pe chhupe the magar savere bhi
nikal paḌe the to phir raah men Thaharte kya
yuun as-pas ka.i peḌ the ghanere bhi
ye shahr-e-sabz hai lekin bahut udaas hue
ghamon ki dhuup men jhulse hue the Dere bhi
hudud-e-shahr se bahar bhi bastiyan phailin
simaT ke rah ga.e yuun jangalon ke ghere bhi
samundaron ke ghazab ko gale laga.e hue
kaTe-phaTe the bahut duur tak jazire bhi
Leave a Reply