Kamal Jafari
ham bayaban se gulistan ki taraf aa na sake
raghbat-e-ḳhar rahi phuul hamen bha na sake
aaj tak rah-e-haqiqat men rahe mere qadam
mujh ko badle hue halat bhi bahka na sake
yuun to kahne ko numa.inda hain aslaf ke ham
un ke qadmon ki magar gard ko bhi pa na sake
in baharon se ḳhuda duur hamesha rakkhe
jin se apne dil-e-bargashta ko bahla na sake
dukh bhare din hon ki hon gham ki bhayanak raten
aaj tak ham kisi mahaul men ghabra na sake
kaise insan se insan milenge dil se
apne zehnon se jab auham ke but Dha na sake
aise jiine se to hasil nahin kuchh faiz ‘kamal’
raushni ban ke andheron pe agar chha na sake
Leave a Reply