Kashfi Lucknavi
mira ḳhulus-e-mohabbat bhi kamran na hua
vo zulm Dhata raha mujh pe mehrban na hua
jabin-e-ishq jhuki hai na jhuk sakegi kabhi
bara-e-sajda agar tera astan na hua
hai baat kya jo abhi tak khile na lala-o-gul
ḳhizan ke ba.ad bhi shadab gulistan na hua
tiri hansi pe luTa dete chand taron ko
hamare zer-e-asar aaj asman na hua
vo aa.e mere tasavvur men shukriya un ka
zahe-nasib mira jazb ra.egan na hua
kisi ke ishq ne vo hausla diya mujh ko
koi bhi gham mire dil par kabhi garan na hua
vo ashiyana ho gulshan ho ya qafas ‘kashfi’
sitam zamane men ham par kahan kahan na hua
Leave a Reply