vo raqs kahan aur vo tab-o-tab kahan hai
vo sajda-e-shauq aur vo mehrab kahan hai
hai abla-pa.i hi tira naqsh-e-kaf-e-pa
sahra-e-laq-o-daq hai yahan aab kahan hai
auraq-e-dil-o-jan men hain kuchh daagh hi baaqi
vo ishq-o-aqidat ka hasin baab kahan hai
ik ashk-e-nadamat ke siva kuchh bhi nahin hai
palkon pe sajaya hua vo ḳhvab kahan hai
ab durd-e-tah-e-jam hai ya tishna-labi hai
sahba vo kahan saghar-e-mahtab kahan hai
kya TuuT ga.e aap hi shabnam ke vo dhage
vo pyaar ka resham dil-e-betab kahan hai
‘tanvir’ rah-e-zist men tanha ye safar kyuun
vo lutf kahan pursish-e-ahbab kahan hai
Leave a Reply