sahra ki dhuup men bhi shajar dekhte rahe
kya log the dua ka asar dekhte rahe
ham apne jism-o-jan ko ḳhizan men utaar kar
gulnar mausamon ke hunar dekhte rahe
barish ki adaton ka badalna muhal tha
jalte hue ham apne hi ghar dekhte rahe
jab bhi tire badan ki mahak ham-safar rahi
ham be-charagh shab men sahar dekhte rahe
ik shahr-e-mah-vashan tha ki ankhon ke saath tha
ham phir bhi teri rahguzar dekhte rahe
‘jazib’ men tere pyaar ki ḳhvahish shadid thi
‘jazib’ ko ahl-e-naqd-o-nazar dekhte rahe
Leave a Reply