Jameel Malik
kal tak kitne hangame the ab kitni ḳhamoshi hai
pahle duniya thi ghar men ab duniya se ru-poshi hai
pal bhar jaage gahri niind ka jhonka aaya Duub ga.e
koi ghaflat si ghaflat madhoshi si madhoshi hai
jitna pyaar baḌhaya ham se utna dard diya dil ko
jitne duur hue ho ham se utni ham-aghoshi hai
sab ko phuul aur kaliyan banTo ham ko do sukhe patte
ye kaise tohfe laa.e ho ye kya barg-faroshi hai
rang-e-haqiqat kya ubhrega ḳhvab hi dekhte rahne se
jis ko tum koshish kahte ho vo to lazzat-koshi hai
hosh men sab kuchh dekh ke bhi chup rahne ki majburi thi
kitni mani-ḳhez ‘jamil’ hamari ye be-hoshi hai
Leave a Reply