koi sanam to ho koi apna khuda to ho
is dasht-e-be-kasi men koi aasra to ho
kuchh dhundle dhundle khvab hain kuchh kanpte charagh
zad-e-safar yahi hai kuchh is ke siva to ho
suraj hi jab na chamke to pighlegi barf kya
ban jaaen vo bhi mom magar dil dukha to ho
har chehra maslahat ki naqabon men kho gaya
mil baithen kis ke saath koi ashna to ho
khamosh pattharon ki tarah kyuun hua hai shahr
dhadkan dilon ki gar nahin avaz-e-pa to ho
baaqi hai ek dard ka rishta so vo bhi ab
kis se nibhaen ham koi dard-ashna to ho
Leave a Reply