Dil Ho Hassas to Jine Mein Bahut ghaTa Hai

dil ho hassās to jiine meñ bahut ghāTā hai

maiñ ne ḳhud apne hī zaḳhmoñ kā lahū chāTā hai

mujh pe ehsāñ hai mirī tesha-ba-kaf sāñsoñ kā

zindagī tujh ko pahāḌoñ kī tarah kaaTā hai

Duub kar dekh samundar huuñ maiñ āvāzoñ kā

tālib-e-husn-e-samā.at mirā sannāTā hai

maiñ chaTānoñ kī tarah jin kī kamīñ-gāh banā

rafta rafta unhīñ lahroñ ne mujhe chāTā hai

mar chukā huuñ maiñ ka.ī baar jahāñ ke hāthoñ

apnī lāshoñ se ‘muzaffar’ ye kuaañ paaTā hai

Leave a Comment