Bala Se Ho Sham Ki Siyahi Kahin to Manzil Meri Milegi

Qamar Jalalvi

bala se ho shaam ki siyahi kahin to manzil miri milegi

udhar andhere men chal paḌunga jidhar mujhe raushni milegi

hujum-e-mahshar men kaisa milna nazar-farebi baḌi milegi

kisi se surat tiri milegi kisi se surat miri milegi

tumhari furqat men tang aa kar ye marne valon ka faisla hai

qaza se jo ham-kanar hoga use na.i zindagi milegi

qafas se jab chhuT ke ja.enge ham to sab milenge ba-juz-nasheman

chaman ka ek ek gul milega chaman ki ik ik kali milegi

tumhari furqat men kya milega tumhare milne se kiya milega

‘qamar’ ke honge hazar-ha gham raqib ko ik ḳhushi milegi