Hosh Tirmizi
go daagh ho ga.e hain vo chhale paḌe hue
hain ab bhi dil men tere havale paḌe hue
dasht-e-vafa men jal ke na rah jaa.en apne dil
vo dhuup hai ki rang hain kaale paḌe hue
sho.ale sa rang kya hai vo husn-e-karishma-saz
hain kashmakash men dekhne vaale paḌe hue
shabnam saza hai jur.at-e-ifsha-e-raz ki
goya zaban-e-gul men hain chhale paḌe hue
dekho hamen ki manzil-e-hosh-o-talab men hain
lekin lab-e-saval pe taale paḌe hue
be-his guzar na yuun chaman-e-rozgar se
kanTe ya phuul kuchh to uTha le paḌe hue
ja.enge shakl-e-nau se sar-e-bazm-e-yar ‘hosh’
munh par bhabut kaan men baale paḌe hue
Leave a Reply