Subodh Lal Saqi
ye bhi hua ki filon ke darmiyan milin
mujh ko kahan kahan miri tanha.iyan milin
fariyad meri daftaron men gunjti rahi
raddi ke Dher men miri sab arziyan milin
ham a.inon ke shahr men nikle the sair ko
har gaam chand ajnabi parchha.iyan milin
phike tabassumon se saje kuchh mahal mile
aur qahqahon men Duubi hui jhuggiyan milin
chhoTa sa shahr hi sahi lekin yahan mujhe
sahra mile sarab mile duriyan milin
jaane se pahle milne ki ḳhvahish rahi use
jaane ke ba.ad us ki mujhe chhuTTiyan milin
Leave a Reply