Rahat Indori
sabab vo puchh rahe hain udaas hone ka
mira mizaj nahin be-libas hone ka
naya bahana hai har pal udaas hone ka
ye faeda hai tire ghar ke paas hone ka
mahakti raat ke lamho nazar rakho mujh par
bahana dhund raha huun udaas hone ka
main tere paas bata kis gharaz se aaya huun
subut de mujhe chehra-shanas hone ka
miri ghazal se bana zehn men koi tasvir
sabab na puchh mire devdas hone ka
kahan ho aao miri bhuli-bisri yaado aao
khush-amdid hai mausam udaas hone ka
kai dinon se tabiat miri udaas na thi
yahi javaz bahut hai udaas hone ka
main ahmiyat bhi samajhta huun qahqahon ki magar
maza kuchh apna alag hai udaas hone ka
mire labon se tabassum mazaq karne laga
main likh raha tha qasida udaas hone ka
pata nahin ye parinde kahan se aa pahunche
abhi zamana kahan tha udaas hone ka
main kah raha huun ki ai dil idhar-udhar na bhatak
guzar na jaae zamana udaas hone ka
Leave a Reply