Roz Khulne Ki Ada Bhi to Nahin Aati Hai

roz khulne kī adā bhī to nahīñ aatī hai

is taraf bād-e-sabā bhī to nahīñ aatī hai

sochtā huuñ ki mulāqātoñ ko mahdūd karūñ

in darīchoñ se havā bhī to nahīñ aatī hai

ab tarīqa hai yahī muuñd leñ apnī āñkheñ

varna duniyā ko hayā bhī to nahīñ aatī hai

us kī qismat meñ haiñ barsāt ke saare tevar

apne hisse meñ ghaTā bhī to nahīñ aatī hai

Leave a Comment