suna ke apne aish-e-tam ki rudad ke TukḌe
uḌa dunga kisi din charḳh ki bedad ke TukḌe
asiri ko ata kar ke asiri ka sharaf ham ne
uḌa daale ḳhud apni fitrat-e-azad ke TukḌe
kahan ka aadmi insan kaisa ma-hasal ye hai
kahin ashḳhas ke purze kahin afrad ke TukḌe
tabahi ke mazon se bhi gae ab vae-mahrumi
sameTunga kahan tak hasrat-e-barbad ke TukḌe
ye siina talḳh yadon ka ḳhazina hi sahi lekin
bahut chubhte hain dil men ik nukili yaad ke TukḌe
tum achchhe hi sahi mera bura hona bhi hai bar-haq
ki ham sab hain kisi majmua-e-azdad ke TukḌe
hamen laḳht-e-jigar khane ko hargiz kam na tha ‘aḳhtar’
magar qismat men likkhe the jahanabad ke TukḌe
Leave a Reply