Dildar Usko Khwah Dil-Azar Kuchh Kaho

dildar us ko khvah dil-azar kuchh kaho

sunta nahin kisu ki mira yaar kuchh kaho

ghamza ada nigah tabassum hai dil ka mol

tum bhi agar ho us ke kharidar kuchh kaho

shirin ne kohkan se mangai thi ju-e-shir

gar imtihan hai us se bhi dushvar kuchh kaho

har aan aa mujhi ko satate ho naseho

samjha ke tum use bhi to yak-bar kuchh kaho

ai sakinan-e-kunj-e-qafas subh ko saba

sunte hain jaegi su-e-gulzar kuchh kaho

aalam ki guftugu se to aati hai bu-e-khun

banda hai ik nigah ka gunahgar kuchh kaho

‘sauda’ muvafaqat ka sabab janta hai yaar

samjhe mukhalif us ko kuchh aghyar kuchh kaho

Leave a Comment