ye izn-e-jast faqat ik bahana hota hai
kahan Thaharte hain vo jin ko jaana hota hai
hamare sar pe mohabbat ka itna bojh na Daal
hamen ma.ash ka dukh bhi uThana hota hai
jahan pe soḳhta jazbat rakhe jaate hain
har ek dil men kahin sard-ḳhana hota hai
hamare tazkire sadiyon labon pe rahte hain
hamare din nahin hote zamana hota hai
tu mo’tariz na ho itna malal-e-besh-baha
kabhi kabhi to hamen muskurana hota hai
uḌa le jaati hai mujh ko vahan samay ki hava
jahan kahin bhi mira ab-o-dana hota hai
kisi ko laati hai rahon men kachche ghar ki ḳhalish
koi safar pe ḳhushi se ravana hota hai
khule-kivaḌ alamat hain aas ki lekin
hava ke ruḳh pe diya bhi jalana hota hai
hamare haal pe jaisi guzar rahi ho ‘hasan’
hamen ravayya bhi vaisa banana hota hai
Leave a Reply