Hasan Akbar Kamal
gham-e-jan gum gham-e-duniya men to hona mushkil
hai samundar ko samundar men samona mushkil
niind jis ne bahut ankhon se uḌa rakkhi thi
ye hua kya ki hua us ko bhi sona mushkil
har sifat apni kahan deta hai gul ḳhushbu ko
ḳhvab dil ke miri avaz men hona mushkil
yuun zamin za.iqa-e-ḳhun se hui hai manus
is men ab fasl-e-mohabbat ki hai bona mushkil
kal hamen milne hain jo gham vo abhi mil jaa.en
aankh pathra.i to ho ja.ega rona mushkil
vaqt ko khelne insan se do ji bhar ke
phir ‘kamal’ us ko hai milna ye khilauna mushkil
Leave a Reply