kahan aur kab kab akela raha huun
main har roz har shab akela raha huun
mujhe apne baare men kya mashvara ho
main apne liye kab akela raha huun
udasi ka aalam yahan tak raha hai
main hote hue sab akela raha huun
yahan se vahan tak idhar se udhar tak
main pashchim se purab akela raha huun
bahut hausla mujh ko main ne diya hai
main rote hue jab akela raha huun
tiri zaat mujh se juda hi rahi hai
main tab ho ki ya ab akela raha huun
Leave a Reply