biite baras ki yaad ka paikar utaar de
divar se purana calendar utaar de
rakh di hai us ne khol ke ḳhud jism ki kitab
saada varaq pe le koi manzar utaar de
bhiga hua libas badan bhi jala.ega
us se kaho ki sar se vo gagar utaar de
donon men ek ko to milin sukh ki sa.aten
la apna bojh bhi mire sar par utaar de
phir kya karoge hai to usi ka buna hua
kah de agar vo la ye sweater utaar de
yuun jhanjhana ke TuTta taara bikhar gaya
jaise urus-e-shab koi zevar utaar de
chahe hai jan-o-mal ki jo ḳhairiyat ‘nazar’
shahr-e-havas se duur hi lashkar utaar de
Leave a Reply