Arif Abdul Mateen
main azal ka rah-rau mujh ko abad ki justuju
gard-e-rah mere jilau men saath mere main na tu
zard tha chehra magar masrur tha pahlu men dil
barg-e-gul jab le uḌa chupke se mera rang-o-bu
mujh ko apne shahar ka har ek zarra hai aziiz
ai hava le ja uḌa kar ḳhaak meri ku-ba-ku
vaqt ka dariya ki jis men main kanval ban kar khula
sochiye to bahr hai aur dekhiye to aabju
main musavvir huun magar tasvir hai ḳhaliq miri
rang bharti hai mire ḳhake men meri aarzu
zaat ka a.ina jab dekha to hairani hui
main na tha goya koi mujh sa tha mere ru-ba-ru
lazzat-e-ḳhud-agahi ka faiz hai ‘arif’ ki ham
pahron apne aap se rahte hain mahv-e-guftugu
Leave a Reply