Sher Afzal Jafri
us ko apni zaat ḳhuda ki zaat lagi hai
mere dil ko pagal ki ye baat lagi hai
kajjug hai aur phir dukhḌon ki barsat lagi hai
nuuh ki kashti mere ghar ke saath lagi hai
mere paas tahi-dasti hai darveshi hai
ye daulat kab shahzadon ke haat lagi hai
gori-chaTTi dhuup na joban par itra.e
din ke pichhe kaali kaali raat lagi hai
ek hasin fir.aun ko bazm-e-sher-o-suḳhan men
meri ghazlon ki pustak taurat lagi hai
main insan ko maut ka dulha kah deta huun
mujh ko matam ki Toli barat lagi hai
Leave a Reply