Mirza Ghalib
baagh pa kar khafaqani ye darata hai mujhe
saya-e-shakh-e-gul afi nazar aata hai mujhe
jauhar-e-tegh ba-sar-chashma-e-digar malum
huun main vo sabza ki zahrab ugata hai mujhe
muddaa mahv-e-tamasha-e-shikast-e-dil hai
aina-khana men koi liye jaata hai mujhe
naala sarmaya-e-yak-alam o aalam kaf-e-khak
asman baiza-e-quamri nazar aata hai mujhe
zindagi men to vo mahfil se utha dete the
dekhun ab mar gae par kaun uthata hai mujhe
baagh tujh bin gul-e-nargis se darata hai mujhe
chahun gar sair-e-chaman aankh dikhata hai mujhe
shor-e-timsal hai kis rashk-e-chaman ka ya rab
aaina baiza-e-bulbul nazar aata hai mujhe
hairat-e-aina anjam-e-junun huun jyuun shama
kis qadar dagh-e-jigar shola uthata hai mujhe
main huun aur hairat-e-javed magar zauq-e-khayal
ba-fusun-e-nigah-e-naz satata hai mujhe
hairat-e-fikr-e-sukhan saz-e-salamat hai ‘asad’
dil pas-e-zanu-e-aina bithata hai mujhe
Leave a Reply