vo jis ki dastan phaili dil-e-divana mera tha
zabanen dushmanon ki thiin magar afsana mera tha
taḌapta huun ki ik saghar kisi hatim se mil jaa.e
zaval-e-asman dekho kabhi mai-ḳhana mera tha
bala ki ḳhamushi taari thi har-su teri haibat se
sar-e-mahfil jo gunja nara-e-mastana mera tha
kaTe yuun to hazaron sar vafa ki karbalaon men
tire neze pe jo ubhra sar-e-shahana mera tha
faqih-e-shahr ko samjho ki ham pakḌe ga.e nahaq
sharaben sab usi ki thiin bas ik paimana mera tha
bana hai ‘arsh’ vo munsif to phir ye bhi kabhi dekhe
hua hai band jo mujh par vahi virana mera tha
Leave a Reply