mohabbat ka qarina aa gaya hai
hamen mar mar ke jiina aa gaya hai
ba-faiz-e-gham ham ahl-e-dil ke hathon
do-alam ka ḳhazina aa gaya hai
tiri shadabiyon ka zikr sun kar
gulon ko bhi pasina aa gaya hai
bhaḌak uThti hai jis men aag dil ki
vo savan ka mahina aa gaya hai
musafir ab kahin to ja lagenge
talatum men safina aa gaya hai
samjhe baiThe hain ḳhud ko rind-e-kamil
jinhen do ghunT piina aa gaya hai
junun ab tak tha ‘mansha’ chak-daman
ab us ko chaak siina aa gaya hai
Leave a Reply