afzal-khan

Shikast-e-Zindagi Waise Bhi Maut Hi Hai Na

shikast-e-zindagi vaise bhi maut hi hai na

to sach bata ye mulaqat akhiri hai na

kaha nahin tha mira jism aur bhar yarab

so ab ye khaak tire paas bach gai hai na

tu mere haal se anjan kab hai ai duniya

jo baat kah nahin paaya samajh rahi hai na

isi liye hamen ehsas-e-jurm hai shayad

abhi hamari mohabbat nai nai hai na

ye kor-chashm ujalon se ishq karte hain

jo ghar jala ke bhi kahte hain raushni hai na

main khud bhi yaar tujhe bhulne ke haq men huun

magar jo biich men kam-bakht shaeri hai na

main jan-bujh ke aaya tha tegh aur tire biich

miyan nibhani to padti hai dosti hai na

More Poems

Leave a Comment