Faisal Ajmi
teri ankhen na rahin a.ina-ḳhana mire dost
kitni tezi se badalta hai zamana mire dost
jaane kis kaam men masruf raha barson tak
yaad aaya hi nahin tujh ko bhulana mire dost
puchhna mat ki ye kya haal bana rakkha hai
a.ina ban ke mira dil na dukhana mire dost
is mulaqat men jo ghair-zaruri ho jaa.e
yaad rahta hai kise haath milana mire dost
dekhna mujh ko magar meri pazira.i ko
apni ankhon men sitare na sajana mire dost
ab vo titli hai na vo umr ta.aqub vaali
main na kahta tha bahut duur na jaana mare dost
hijr taqdir men likkha tha ki majburi thi
chhoḌ is baat se kya milna milana mire dost
tu ne ehsan kiya apna bana kar mujh ko
varna main kya tha haqiqat na fasana mire dost
is kahani men kise kaun kahan chhoḌ gaya
yaad aa jaa.e to mujh ko bhi batana mire dost
chhoḌ aaya huun havaon ki nigahbani men
vo samundar vo jazira vo ḳhazana mire dost
aise raston pe jo aapas men kahin milte hon
kyuun na us moḌ se ho jaa.en ravana mire dost
Leave a Reply