har-chand gaam gaam havadis safar men hain
vo ḳhush-nasib hain jo tiri rahguzar men hain
takid-e-zabt ahd-e-vafa izn-e-zindagi
kitne payam ik nigah-e-muḳhtasar men hain
maazi sharik-e-hal hai koshish ke bavajud
dhundle se kuchh nuqush abhi tak nazar men hain
lillah is ḳhulus se pursish na kijiye
tufan kab se band miri chashm-e-tar men hain
manzil to ḳhush-nasibon men taqsim ho chuki
kuchh ḳhush-ḳhayal log abhi tak safar men hain
mahfil men un ki samt nigahen na uTh sakin
ham bil-ḳhusus ahl-e-nazar ki nazar men hain
ye kaise rah-rau the ki har naqsh-e-pa ke saath
sajdon ke kuchh nishan bhi is rahguzar men hain
Leave a Reply