Sajjad Baqar Rizvi
tire taghaful se hai shikayat na apne miTne ka koi gham hai
ye sab ba-zahir baja hai lekin ye aankh kyuun aaj meri nam hai
na.i umangon ko saath le kar ravan huun phir jada-e-vafa par
magar hai ehsas-e-na-muradi ki sahma sahma sa har-qadam hai
miri ummidon ko raund kar ab miri ḳhushi ki hai tum ko parva
ye kya naya ruup tum ne dhara ye kya koi nit-naya bharam hai
tumhen vo lamhe to yaad honge ki jab tumhen yaad the ye fiqre
tumhen mire sar ka vasta hai tumhen miri jaan ki qasam hai
vo mehrban kyuun hue hain mujhe par vo puchhte hain to kah do ‘nayyar’
huzur zinda huun ji raha huun baḌi navazish baḌa karam hai
Leave a Reply