Mushafi Ghulam Hamdani
atish-e-gham men bas ki jalte hain
shama saan ustukhvan pighalte hain
vahi dasht aur vahi gareban chaak
jab talak haath paanv chalte hain
dekh teri safa-e-surat ko
aine munh se khaak malte hain
joshish-e-ashk hai vo ankhon men
jaise us se kuen ubalte hain
dekh aariz ko tere gulshan men
saikdon rang gul badalte hain
shokh-chashmi butan ki mujh se na puchh
ki ye nazron men dil ko chhalte hain
dekhiyo shaikh ji ki chaal ko tuk
ab koi dam men ye phisalte hain
bin liye kaam dil ka us ku se
‘mushafi’ ham koi nikalte hain
Leave a Reply