Zakia Ghazal
ḳhud se juda hue to kahin ke nahin rahe
yuun dar-ba-dar hue ki zamin ke nahin rahe
rishte rafaqaton ke raqabat men Dhal ga.e
divar-o-dar bhi apne makin ke nahin rahe
hijrat-zada libas men phirte hain dar-ba-dar
rahna tha jis nagar men vahin ke nahin rahe
ye kuza-gar ye chaak ye miTTi ye aag sab
zo.am-e-hunar men dekh kahin ke nahin rahe
ḳhvabon ke zaḳhm aankh se risne lage ‘ghazal’
ye dard-e-jan bhi qalb-e-hazin ke nahin rahe
Leave a Reply