Farigh Bukhari
dekhe koi jo chak-e-gareban ke paar bhi
a.ina-e-ḳhizan men hai aks-e-bahar bhi
ab har-nafas hai bhigi sadaon ki ik fasil
mauj-e-havas thi gardish-e-lail-o-nahar bhi
kya shorish-e-junun hai zara kam nahin hua
qurbat ke bavajud tira intizar bhi
kitni aqidaton ke jigar chaak ho ga.e
kya sehr tha shu.ur-e-nazar ka ḳhumar bhi
jo arsh-o-farsh par kabhi aaya nahin nazar
dekha hai us ko ham ne sar-e-rahguzar bhi
vo shor-e-husn tha dam-e-nazzara-e-jamal
ham sun sake na apne badan ki pukar bhi
‘farigh’ ḳhayal-e-yar se main ham-subu raha
guzri hai mai-kade men shab-e-intizar bhi
Leave a Reply