dhajji dhajji jubba-o-dastar hote dekhna
‘mir’ ko be-ashiqi bhi ḳhvar hote dekhna
kasrat-e-danishvaran ko qaht-e-danish janna
vus.aton ko dasht ki divar hote dekhna
rukne vaali hai fishar-e-dam se nabz-e-inhiraf
ḳhud ko ab sar-ta-ba-pa inkar hote dekhna
pir-e-sad-sala se sunna qissa-e-asudgi
lamha lamha ziist ko dushvar hote dekhna
dekhna lafzon ko ma.ani se mafar karte hue
chup ke aalam men mira iz.har hote dekhna
thiin jo kal tak shab-guzari ka vasila hijr men
ab unhin yadon ko tum azar hote dekhna
qasr-e-kohna ham ki kuchh mahsus tak karte nahin
sirf apne aap ko mismar hote dekhna
Leave a Reply