zehn men lagta hai jab ḳhush-rang lafzon ka hujum
dhundla dhundla sa nazar aata hai logon ka hujum
umr bhar ke ai thake haare musafir hoshiyar
manzilon se pesh-tar hai ik daraḳhton ka hujum
us ki yadon ka saman bhi kis qadar pur-kaif hai
jaise gulshan men utar aa.e parindon ka hujum
mehrban jab se hue jangal pe suraj devta
zard sa lagne laga sarsabz peḌon ka hujum
sahm jaata huun akela pa ke apne aap ko
nasb ho divar-o-dar men jaise ankhon ka hujum
ahd-e-mazi ki taraf chaha hai dil ne lauTna
dekh kar schōl ke ma.asum bachchon ka hujum
Leave a Reply