kisi taur ho na pinhan tira rang-e-ru-siyahi
vo sab ankhen bujh chuki hain ki jo den miri gavahi
ho nasib har kisi ko kahan manzil-e-mohabbat
ki ujaḌti jaa.en rahen ki bikharte jaa.en raahi
tire nuur par fida huun magar is qadar fida huun
mujhe dekh hi na paa.e ye jahan ki kam-nigahi
main jo aah bhar raha huun tujhe yaad kar raha huun
ki tire baghair main ne kabhi zindagi na chahi
koi yaad ham-nafas ho jo mire liye qafas ho
ki azal se jis tarah hai ye jahan-e-ab-o-mahi
yahi zindagi gulistan yahi zindagi hai zindan
isi zindagi se main ne yunhi dosti nibahi
sar-e-sham luT chuka huun sar-e-am luT chuka huun
ki Dakait ban chuke hain ka.i shahr ke sipahi
Leave a Reply